اليوم طيّبتلكم المقنتة (( الطمينة ))

السلام عليكم ورحمة الله وبركاته
اليوم طيّبتلكم المَــقْــــنَتَـــة ( إسم لأكلة يسمونها من يقطنون في ولايات الغرب الجزائري )
والمعروفة عند الأغلبية بإسم طبق (( الطمينة ))
هي ساهلة ماهلة برك لازم نعرفوا كيش غادي نتعاملوا مع السميد في التوفار باش ماتجيناش ناشفة وتاني ماتجيناش معجنّة لازم تكون تذوب في الفم (( بنينة ))
وتنجمُّوا تجربوها بنفوسكم ونتمنالكم تنجحوا فيها في المرة الأولى
بلا مانطول عليكم غادي نقدم ليكم المقادير فيه بيه
المقادير:
عندنا كمية تاع السميد (( نوع متوسط )) كيما تبغي تديري على حساب الأفراد في العائلة ( رطل _ كيلو ,,,, )
عندنا تاني كمية تاع الملح
عندنا كمية تاع الزيت بحوالي مقدار 3 أرباع كأس
وتاني كمية تاع الماء
طريقة التحضير:
دروك غادي نبداو : نوجدوا قصعه نفرغوا فيها الكمية تاع السميد ونضيفوا ليها الزيت والملح ونحبسوا ومن بعد نبقوا نبسّوا الخليط هداك باليدين جيدا حتى تدخل المكونات في بعضها نبسّوه مليح ودروك يجي الدور تاع الماء نرشّوا برك حتى يترفد السميد ونقدّوا نشفوه غادي يتلم (( ملاحظة: منخلوش الخليط هدا يتعجن لازم يكون مبسس ))
أومبعد نخلوه مدة 10 دقائق يرتاح بصح في هادي 10 دقائق لازم نشعلوا الفرن نخلوه يحمى غاية
أومبعد نجيبوا الصنية كبيرة تاع الفرن نحطوها ونفركتوا الخليط في الصنية ونفرشوه قاع بصح تكون عندنا طبقة سميكة شوية ماشي بزاف
أومنبعد نقطعوا بالسكين على شكل مربعات كبيرة شوية وندخلوا الصنية في الفرن
نخلوا هاد المبسس يطيب لازم يكون لونه قريب ذهبي ماشي أحمر وماشي محرووووووق ههههههه
لازم نبقاو خطرة على خطرة واقفين مع الفرن مايكون خضر مايكون يابس ,,,, أوك
من بعد نخرجوه ونفرغوه في غربال تكون عينيه كبيرة ونفتوه مليح في القصعه اللي تكون من التحت حتى نتحصل على دقيق طايب
منبعد نوجدوا قدر فيه كمية من الماء ونحطوه يغلي على النار ودروك تجي مرحلة التوفار
نفوروا هاد الدقيق وبعد النضج كيما الكسكس نحطوه في القصعه ونرشوه بالماء الزهر آه ماغاديش نقوّوا منه باش ميتعجنش لينا ,,, أوك
أوبعد نعاودوا نوجدوا القدر مرة أخرى باش يغلي ونعاودوا نفوروا مرة ثانية
بعد التوفار للمرة الثانية وبعد النضج نحطوه في القصعه ونديروا الزبدة ذائبة والقليل من الحرور ورأس الحانوت وتاني الفول سوداني مطحون وطبعا حلوة الترك والعسل ,,,,, أممممم لذيذة هههههههههه
أيا وغادي نحطوا في الطبسي ونوجدوا طوابع تكون على شكل قلوب أو أشكال كيما راكم باغيين نتوما
ونزينوا بالقرفة وحبات الدراجي
وبهذا نكونوا طيبنا مقنتة ولا كيما يقولوا الطمينة
وهذا هو شكلها في الأخير
إن شاء الله تنال إعجابكم