هل أنتَ رآضي عن حيآتكِ ؟!

[ندعوك للتسجيل في المنتدى أو التعريف بنفسك لمعاينة هذا الرابط]

بسم الله الرحمن الرحيم
ادخل في الموضوع بعدة أسئلة

هل انت راضي عن حياتك ؟
هل انت راضي عن علاقتك بربك ؟
هل إنت ضامن عمرك ؟
هل تعتقد إنو عندك رصيد كافي من الحسنات تقابل فيه ربك ؟!؟

انا عن نفسي كل الأجوبة لا وهذا الكلام ليا قبل ما يكون لكم
وأتمنى يكون من القلب إلى القلب وأغلبنا عايشين المشكلة عشان كدا حبيت أطرحها
حبايبي إحنا عايشين وشايفين إلي يسير حولنا من تغيرات وخلاص
القيااامة قربت لازم نحاور نفسنا ونتناقش مع نفسنا إيش ساير
في صلاتنا أنا عن نفسي بسرعة وننقرها نقر الديك نسلم من الصلاة
واحنا مو عارفين إيش قرأنا أصلاة ناهيك عن المعاصي التانية أنا
ليش ركزت على الصلاة لانها عماد الدين لو صلحت صلح حالنا
ولأن الصلاة هي النجاة ياعالم احنا ناخد النفس ما نضمن نموت
عشان ننزل الهوا ولا نعيش وكيف ياربي ننسى ونروح ونعمل الذنوب
ولا كأنو ورانا يوم حساب والله لو كنا طول الوقت مفتكرين إن و في
ملكين يكتبو كل شي كان حسبنا حساب كل خطوة وكل كلمة ياربي
إيش حيكون موقفنا لو ربي أخد أرواحنا دحين حتاخدنا ملائكة
الرحمة ولا العذاب حيتوسع لنا القبر ولا يضيق علينا حنلاقي
عمل صالح يؤنسنا ولا حنبتلى بأعمالنا القبيحة ترافقنا حنموت
على حسن خاتمة ولا لا وعلى فكرة كل واحد لو سألتو كيف
تبغى تموت حيقول وأنا ساجد أو وانا أطوف طيب على بالنا إنو
الموت حيقلنا لوسمحت أنا جاي آخد روحك روح صلي عشان
تقابل ربك فيه لا طبعا في لمح البصر راح تروح الروح وإلي
يختم له بسوء -أجارنا الله- هذا بسبب دسيسة في قلبو يعني كيف ؟
الدسيسة هوا الشي إلي نفسك تسوييه لكن منتا قادر يعني زي واحد
نفسووو يشرب خمر لكن عشانو ممنوع في بلادو ماشرب في مقابل
لو لقى في أي مكان حيشربو يعرف إنو حيموت على دا الشي وكل
واحد يدور في قلبو إيش المعصية إلي يتمنى يعملها لكن الظروف ما
سمحت حيكون عليها ختامو لازم نحاول نكثر من الطاعات عشان لمن
نقبض نقبض وإحنا على خير صحيح في ناس كتير حاولو يغيروا في
نفسهم لكن يرجعو زيي انا كل ما أحاول أتوب أكتر من اسبوع ما أكمل
وسالت أبلتي إيش أعمل ؟ قالتلي كون إنك كل مرة تتوبي وترجعي للذنب
هدا جهاد تاخدي عليه أجور شفتو كيف ربنا رحيم لا تيأس من ربي أبدا
توب وارجع للغلط مرة واتنين وتلاتة وكن واثق إنو الله لن يضيعك وراح
يهديك الهداية إلي كنت تتمناها وكثير مننا نفسو يتوب لكن خايف من
الأشياء إلي حتسير له يعني إلي تفكر تغطي وجهها حتقول حيتريقوا
عليا ما حقدر أخرج مع البنات ومن دا الكلام إلي يمليه الشيطان
على عقلها عشان تبطل أنا ما أقلكم طريق الحق ما فيه مشقة .
إلا فيه مشقة لأنو إلي نطلبة عالي والثمن غالي إحنا نطلب جنة
عرضها السماوات والأرض أصلا احنا مصيرنا يا جنة يا نار
مافي خيار تالت عشان كدا نضحي بأرواحنا عشانها يا ما ناس
ضحو بارواحهم وأهلهم ومالهم وإحنا مو قادرين نضحي بأغنية
ولا لبس ولا شي من أشياء الدنيا التافهه الرسول -صلى الله عليه وسلم-
الجنة حفت بالمكارة والنار حفت بالشهوات عشان كدا لازم نحاول نغير
من نفسنا للوصول إلى الله والفردوس الأعلى بالله ما نفسكم نجلس بين
الرسول ويحكلنا ونحكي له وبين الصحابة أبو بكر وعثمان وعلي -رضي الله عنهم-
ما نفسكم بعد ما نعبرالصراط نشرب من يد الرسول -صلى الله عليه وسلم -
شربة لانظمأ بعدها أبدا ونشوف الرسول إلي طول عمرنا واحنا نقول نحبو
لكن للأسف ما طبقنا حبو ترى حبنا إحنا أكتر من أصحابو وقال إحنا أخوانو
لكن للأسف إحنا مو قد اللقب آسفين يا رسول الله ما اتبعنا سنتك وماعملنا
بما أمرتنا ولااجتنبنا ما نهيتنا عنه لكن نسأل الله أن يعيننا
لكي نعيد الهد ونحفظ الوعد لنكون معك في جنة الخلد
يلا لازم من اليوم نبدأ نغير نفسنا لأنو محد ضامن عمرو في قدامنا فرصة
نكون شاب نشأ في طاعة الله عشان يكون جزائنا نستظل تحت عرش الرحمن
الطلب غالي ولازم نجاهد عشان نوصل له ولا ترى ما في احد يقدر يستحمل
الحر في ذاك اليوم ولا نقدر نتحمل نار جهنم لازم نفتش في قلوبنا ونتعلم عن
ديننا لانو أنا ممكن أكون منافقة ومشركة وأنا ما أعرف وأعمل شي أحسبو
صح أو حلال وهو عند الله عظيم (( وتحسبونه هينا وهو عند الله عظيم ))
ماقلت دا الكلام إلى لاني زي ما أتمنى لنفسي الهداية أتمناها لكم وأعتذر
عن الإطاله وأسأل الله أن يرينا طريق الحق ويرزقنا اتباعة
ويرينا طريق الباطل ويرزقنا اجتنابه
وأن يثبت قلوبنا على ما يحب ويرضى
اللهم ارزقنا العفة والحياء والستر
اللهم ثبتنا عند السؤال

آمين آمين آمين يارب العالمين
أولا اشكركي على هذا الموضوع القيم وجزاكيا لله خيرا
ثانيا سأجيب بالمختصر المفيد وارجوا ان يصل مقصودي إليكم
هل انت راضي عن حياتك ؟
راض عن حياتي بقدر رضاي بمماتي
هل انت راضي عن علاقتك بربك ؟
راض عن علاقتي بربي بقدر رضاي بعلاقتي بنفسي
هل إنت ضامن عمرك ؟
لا ضمان لعمري فقط ضامن لما ماضى من عمري اي ما مضى فأنا قد عشته وانقض ولكن العمل الذي قمت به محفوظ
هل تعتقد إنو عندك رصيد كافي من الحسنات تقابل فيه ربك ؟!؟
لا اعتقد هذا حتى لا يمنعني هذا من المتابعة وزيادة الطاعة فيجب دوما ان اعتقد النقصان حتى اجتهد واعمل دوما
تعلمين لما لان ما عملته لا اعلم هل قبل مني ام انه سيرد علي يوم القيامة من دون قبول
وفي الأخير اعمل لدنياك كأنك تعيش ابدا واعمل لأخراك كأنك تموت غدا
وفقنا الله لما يحب ويرضى ورزقنا حسن النية والإخلاص والقبول

آمين آمين آمين يارب العالمين

شكرا لمرورك واضافتك الرائعان